شعر | لا تبرر لي غيابك

آزال الصباري *

القصيدة الغزلية أو العاطفية التي شاركت فيها بمسابقة البعداني للشعر الشعبي والتي فزت فيها بالمركز السابع.

إيه احبَّك.. وانت قُلِّي من تحب؟
لجل من هديت كل اللي بنيته؟!

إيه أحبك.. إيه أحبك وانتسب
لاسم حبك، وانت وحدك من عنيته

أنت فرحي أنت جرحي أنت طب
انت مشوار الغرام اللي بديته

أنت أول  كأس  لاجلي ينسكب
وأنت آخر كأس عندي ما هنيته

أنت هاجس في الحنايا ينطرب
أنت وزن الشعر وايقاعه وبيته

كيف صارت صعب كلمه  تنكتب
وانت حبي في سطورك كم مليته

صرت ناسي،  صار عقلك يغترب
صرت تهرب من سؤالي لو قريته

واسمي اخر إسم منه  تقترب
كِنّ ما شفته ولا عمرك دعيته

لا تُقلي  إن قلبك   ما   يحب
لا تبرر، قد حفظت اللي حكيته

كُنتْ جمرةْ،  في الليالي تلتهبْ
كنت تجنن، لو غرامي ما ارتويته

كنت تحلم من حدودي تقترب
كان عندك روح فيني مستميته

قول عادي  إن صدرك قد سحب
من ضلوعه نبض قلبي ذي غزيته

قول عادي “ما أحبَّكْ” وانسحبْ
ادري ان الحب يا قاسي، نسيته

قول إنك شخص  خاين  قد  تعب
وان عهد الحب في لحظه طويته

لا تُقلي عن  غايبك  والسببْ
السبب معروف عندي وان خفيته

ادري انك خلف تيهك محتجب
تجني الوهم الذي بيدك سقيته

* شاعرة وكاتبة من اليمن