دلال وسمير.. قصة حب منذ الطفولة واستقبال مهيب في العالم الآخر

معين برس:

رحيل الفنانة #دلالعبدالعزيز إلى ربها بعد اشهر قليلة على رحيل زوجها الفنان #سميرغانم يشعل مواقع التواصل الاجتماعي، وسرديات الناشطين والمعجبين تروي تفاصيل قصة حب جمعة النجمعين منذ الطفولة وانتهت برحيل متقارب.

محرر معين برس اختار لكم من حائط fatima Elaaraby ما حبكته مشاعرها وصاغته في سردية خيالية وبالعامية المصرية، عكست حجم المتابعة الكبيرة للراحلين:

_ كل دا تأخير يا ست هانم ؟ اهو انتو كدا يا ستات تقفوا قدام المراية بالشهر وتضيعوا أهم المواعيد

= سمير ؟! إنت بتعمل ايه هنا

_ جاي ازور واحد صاحبي ، بالذمة دا سؤال تسأليه

= إنت جيت هنا إمتى ، انا كنت دايما بسألهم عليك وكانوا بيقولوا بخير

_ يا عبيطة ، وكنتي بتصدقيهم ؟

= بصراحة لأ ، قلبي مكانش مصدق ، بس كنت بغصب نفسي اصدق ، اصل الحياة كانت هتبقى وحشة أوي من غيرك

_ تعرفي انك وحشتيني أوي ؟ آه والله ، انتي احلويتي ليه كدا ؟ صحتك جت عالموت

= موت ؟ هو فين الموت دا ؟ انا نمت صحيت لقيت نفسي هنا

_ العبط اللي تحت بيقولوا عليه موت ، تعالي كدا افرجك حاجة

= بالراحة يا سمير متشدنيش كدا انا صحتي متستحملش

_ صحة ايه فوقي بقى ، هنا مفيش تعب ، انتي مبصيتيش في مراية من ساعة ما جيتي ؟

= عايز توريني إيه طيب ؟

_ الشباك دا ، كنت ببص منه عليكي وانتي في العناية المركزة ، وكنت بدعي تجيلي هنا بسرعة

= إخص عليك يا سمير ، بتدعي عليا اموت

_ هههههه ، دي هتقولي موت برضو ، يا بنتي خلاص ، مفيش حاجة اسمها موت تاني ، طب بصي كدا

= يا حبايبي ، دول البنات ، صعبانين عليا اوي يا سمير

_ وحياتك وصعبانين عليا انا كمان ، مش هما وبس ، أي حد لسه مش فاهم صعبان عليا

= تيجي ننادي عليهم ونقولهم ميزعلوش ، نقولهم كلنا هنتقابل هنا في الآخر ، هنا مفيش فراق تاني

_ مش هيسمعونا للأسف ، اول ما جيت هنا قعدت ازعق ، انادي عليكي وعلى البنات ، وعلى الناس اللي بتعيط عليا ، كنت عايز اقولهم بتعيطوا ليه يا عبط ، دا هنا احسن من عندكم بكتير ، بس محدش سمع صوتي

= يظهر اننا لازم نجرب الأول عشان نصدق

_ سيبك انتي انا عايز اقولك حاجة مهمة

= قول

_ أنا بحبك أوي ، عمري ما هنسى انك صممتي تتجوزيني رغم فرق السن الفظيع اللي بيني وبينك ، ووقفتي جنبي طول حياتي وغيرتي فيا كل الصفات الوحشة ، ومستحملتيش تعيشي تحت من غيري ، خلاص ، مفيش فراق تاني

= هتفضل تحبني لحد إمتى ؟

_ هفضل احبك طول عمري

= طول عمرك ؟! ما خلص عمري وعمرك

_ يا عبيطة ، احنا عمرنا ابتدى دلوقتي ، حمدلا عالسلامة يا ديدي