شعر | شفتها بالعصر
معين برس | شعر- أحمد محمد الصيادي:
شفتها بالعصر وقت الغفلة
فجأة وعقلي من همومي فاصل
بااطراف عيني لمحت تلك المقلة
سبحان ربي خلقها متفاعل
تفاعلت ذرات دهشة خله
وماناش خله بس قولت قايل
معجب وشلت انتباهي كله
واصبحت اقيس اطوالها بمسائل
ما كان قلبي منتبه لطله
لكن طلتها تثير الجاهل
بعيونها جابة لصدري قتله
اشهد بعينيها اللفين قاتل
والرمش يلعن للمعدل شكله
باتقرح البغمة وهو متساهل
وانفها اين شالقى مثله
لو قلت لك كالسيف عاده باطل
والثغر داوى القلب علة علة
حتى همه صار ذكرى راحل
هي فاتنة ياناس جه محتلة
لأرض صحراء جافة بالداخل
احس إني مشتعل كاالشعلة
وحاولت اشكي بس ما اتنازل
للعقل صارت باإنطوائي ضله
واشوفها في وقت ما تتمايل
اللقيت ضعفي وقلت ما شاامله
حتى لو اسهر ليلها بالكامل
وفكرت ياخي كل شي له حله
وحاولت اوجد حل أظنه فاشل
ياليت يقبل فكرتي في وصله
وقلت لو تسمح معي تتواصل
قالت أظنك شخص فاقد عقلة
تعرف ايش تقول أظنك فاصل
جاوبت لو قد قلت تسمح قبلة
أظن فيها تحسبيني عاقل
ردة في ضحكة وأعطت مهلة
قلت انا دونش دماري شامل
لا تحسبين الصد حاجه سهله
شاموت دونش والهوى متنازل
ردة عليا والهوى ايش دخله
انت قلت معجب يامتجاهل
جاوبت اقسم إن قلبي كله
مغرم هواش والحب ما هو عادل
قالة هذا القلب ملكك شله
وارجوك اوبه بالهوى تتساهل
واكملت في حلمي آخر جوله
بس الحقيقة صدها متواصل
( بداية طيش )
11 يونيو 2020م
